LAOAG CITY – Kalikagum ni Ms. Shey Pia Abaya a mapagbalin a digitalize ti serbiso iti Public Employment Service Office (PESO) ditoy ciudad ti Laoag.
Segun kenkuana, addan to iti manamnama a pannakisaritana iti Information Technology Office iti lokal a gobierno ditoy ciudad tapno maplano daytoy a naimbag.
Inbatad na a nasaysayaat no adda iti maaramid a programa tapno ditoy nga ipasa dagiti aplikante iti resume, requirements ken dadduma pay a dokumento.
Kunana a babaen iti daytoy nga addang ket ad-adda a mapaalisto dagiti maipaay a serbisyo kadagiti umili ken sangsangkamaysa ti pannakaiyurnus dagiti dokumento iti opisina da.
Kabayatanna, inpakaammo ni Abaya nga addan iti 19 a na-hired on the spot iti panangisayangkat da iti Local Recruitment activity para iti panaglukat iti dakkel a mall ditoy ciudad.
Innyon na nga addan to pay iti maangay a Job fair babaen ti Public Employment Service Office ditoy ciudad ti Laoag kadagiti sumarsaruno a bolan.
