LAOAG CITY – Naminsan manen a nakapasar ni Pope Francis ti dua a serye ti “acute respiratory insufficiency” idi Lunes, Marso 3.
Naitaray iti Gemelli Hospital idiay Rome ni Pope Francis idi pay Pebrero 14 ken saan pay a nakaruar sipod idin.
Daytoy ket kalpasan a naduktalan nga agsagsagaba isuna ti severe respiratory infection.
Basar iti kaudian a medical update ti Santo Papa, manarimaan nga agsagsagaba daytoy ti dua a serye ti acute respiratory insufficiency gubuay iti significant accumulation ti endobronchial mucus.
Maipalagip a nakapasar pay ti Santo Papa ti bronchospasm isu’t gapuna a nangisayangkat dagiti doktor ti dua a bronchoscopies wenno wagas tapno tingitingen ti pagnaan ti angin.
Naammoan a tapno makatulong iti panagangesna ket kasapulan nga agusar ni Pope Francis ti non-invasive, ken mechanical ventilation.
Immuna iti daytoy, naipadamag nga idi weekend ket apagapaman a simmayaat ti kasasaad ni Pope Francis.
