LAOAG CITY – Kinumpirmaran ti mangidadaulo ti Eastern Mindanao Command (Eastmincom) a natayen idi nabirokan dagiti dua a piloto a nakalugan iti mapukpukaw nga FA-50 fighter jets kabayatan a mangisaysaysangkat ti tactical night operations.
Inbatad ni Eastmincom Commander Lt. Gen. Luis Rex Bergante, nabirokanda ti aircraft iti Mt. Kalatungan idiay Bukidnon no sadinno a nakita dagiti dua a piloto nga adda pay laeng iti uneg dagitoy ngem awanen ti biagda.
Inbatad ni Bergante nga ar-aramidenda ti amin tapno maibaba ti bangkay ti dua a piloto.
Kuna ti heneral a basar iti nagbalin a report kenkuana dagiti tropa, nadadael ti aircraft ngem inlawlawagna a saan daytoy a bimtak.
Iti agdama, naka-cordon daytoyen iti lugar ti nagsuekan ti FA-50 fighter jet para iti maiwayat nga imbestigasion.
Kabayatanna, bayat a maisursurat daytoy a damag ket agbanbantay dagiti suldado iti nasao a lugar.
