LAOAG CITY – Inabisoan ti Department of Education (DepEd) dagiti pampubliko a pagadalan iti pagilian a maapektaran ti nakaro a kinabara ti panawen a mangisayangkat ti adjustment ti oras iti panagserrek wenno ipatungpal ti remote learning system.
Daytoy ti agbalin a solusion ti departamento nga imbes nga agkanselar ti serrek tunggal makapasar ti napudot a paniempo.
Nasken a suruten dagiti pagadalan ti pammilin dagiti local chief executives iti panangsuspenso ti klase.
Inbatad met ni Department of Education Secretary Sonny Angara a no mangipatungpal ti panangsuspenso ti klase ket maiyakar iti alternative learning performance-based wenno mangiwayat laengen ti make-up classes.
Inbilinna dagiti opisina ken pagadalan nga isagana ti panagusar ti self-learning modules ken Dynamic Learning Program iti kanito a maipatungpal ti alternative delivery mode wenno ADM.
