LAOAG CITY – Inpasigurado ti Malakanyang a nakasagana ti gobierno iti baet dagiti ispekulasyon a maipagarop a nangiparuk-at ti warrant of arrest ti International Criminal Court (ICC) kontra ken ni dati a Presidente Rodrigo Duterte.
Inbatad ni Presidential Communications Office (PCO) Ad Interim Secretary Jay Ruiz nga adda ti mangmangngeg da a sayangguseng a maysa a warrant of arrest ti inparuk-at ti International Criminal Court kontra ken ni dati a Presidente Duterte para iti crimes against humanity.
Mainaig iti daytoy, inlawlawag ni Palace Press Officer Undersecretary Atty. Claire Castro nga awan pay ti kumpirmasyon manipod iti Palasyo iti pannakaiparuk-at ti warrant of arrest kontra iti dati a presidente.
Ni dati a Presidente Duterte ken ti anakna a ni Vice President Sara Duterte ket adda iti agdama idiay Hongkong tapno agatendar iti thanksgiving event dagiti Overseas Filipino workers (OFWs).
Kabayatanna, awan ti pakadanagan ni dati a Presidente Duterte iti report a pannakaiparuk-at ti warrant of arrest manipod iti International Criminal Court (ICC).
Iti panagbitla na iti sangwanan dagiti overseas Filpino workers iti Hong Kong, inbatad na nga ammo na nga ado dagiti agsusukot a kaso na.
Inpetteng na a nabayagen a kamkamaten ti ICC ken inpalgak na nga awan ti basolan na gapu ta inaramid na laeng ti trabaho na tapno maaddaan ti naulimek ken natalinaay ti panagbiag dagiti Pilipino.
Innayon na nga inaramid na dagiti nasao nga alegasyon para iti pagsayaatan ti pagilian.
