LAOAG CITY – Naragsak nga inpakaammo ti Provincial Tourism Officer a ni Mr. Ianree Raquel nga in-inot a nakarekobre ti probinsia iti benneg ti turismo, kalpasan ti napasaran a pandemya kadagiti naglabas a tawen.
Imbatad ni Raquel a ngimmato ti 16.9% ti Tourism Revenue iti probinsia wenno katukad ti P10.4-billion.
Kunana a nakairekord ti opisina da iti nasurok a 4.3 million a turista nga immay bimmisita ditoy probinsia idi 2024, nangatngato no ikompara iti nasurok 3.6 million a nairekord idi 2023 idinto nga idi 2019 sakbay ti pandemya ket 3.8 million.
Patien ni Raquel a ti kangrunaan a sublia-sublianan dagiti turista ket dagiti agkakapintas a tourist destination ditoy probinsya.
Kuna na a numero uno latta iti ili ti Pagudpud a kangrunaan a turturungen wenno bisbisitaen dagiti turista gapu iti white sand iti Saud Beach, ken ti agmaris asul a danom ti baybay iti Balaoi Blue Lagoon.
Karaman pay kadagiti atraksyon a mabisbisita ditoy probinsia ket ti Malacañang of the North iti ili ti Paoay, Kapurpurawan Rock Formation ken Cape Bojeador Lighthouse iti Burgos, Bangui Windmills, Madongan Dam iti Dingras, La Milagrosa and Waterpark iti Badoc, Batac Riverside Empanadaan ken Paoay Sand Dunes.
Namnamaen ti Tourism Office nga ad-adu pay a bisita ken turista ti agturong ditoy probinsia iti iseserrek ti summer a season.
