LAOAG CITY – Naikeddeng nga agbiahe idiay Russia ni United States Middle East Envoy Steve Witkoff tapno makataripnong ni President Vladimir Putin.
Daytoy ket kalpasan nga immannugot ti Ukraine ti 30 nga aldaw a ceasefire nga indiaya ti Estados Unidos.
Nakasarita metten ni United States National Security Advisor Mike Waltz ti Russian counterpart daytoy mainaig iti nasao a taripnong.
Mangnamnama ti White House nga agbalin a nabunga ti maiyuswat a taripnong.
Maipalagip nga inpannakkel ni United States President Donald Trump nga aramidenna ti amin a kabaelanna tapno naan-anayen nga agsardeng ti gubat iti nagbaetan ti Russia ken Ukraine.
