LAOAG CITY – Manarimaan ti construction dagiti sanitary landfill iti dadduma nga ili ditoy probinsia.
Segun ken ni Mr. Victor Dabalos, ti mangidadaulo iti Provincial Environment and Natural Resources Office, ammo dagiti lokal a gobierno ti kinapateg ti landfill iti bukod da a lugar.
Inpakaammo ni Dabalos a dagiti ili a manarimaan ti construction ti sanitary landfill na ket ti Marcos, Dumalneg, Solsona ken Adams; idinto a manamnama iti pannakaipasdek ti landfill iti ili ti Pinili, ken awan pay iti ili ti Pagudpud.
Patienna a dakkel a tulong ti landfill iti tunggal ili tapno saanen a kasapulan nga agturong dagiti kabangibang a lugar a mapan laeng agibasura ken tapno mismo nga isudan ti agsegregate ti bukod da a basura.
Kabayatanna, inlawlawag ni Dabalos a nabaybay-an ti ili ti Piddig ti landfill da gapu ta agkaiwarang dagiti basura ken dandani dumanon payen iti kalsada.
Nupay kasta, kunana a naiyuman na daytoyen iti lokal a gobierno tapno saan nga agbalin a problema ken possible a pagtaudan ti sakit.
