LAOAG CITY – Kalikagum ti Public Employment Service Office ditoy siudad ti Laoag ti Career Guidance Advocacy Program para kadagiti pagadalan ditoy siudad.
Segun ken ni Ms. Shey Pia Abaya, mangidadaulo ti Public Employment Service Office ditoy siudad ti Laoag, makisarita kadagiti Principal ditoy siudad tapno mapalubusan dagitoy a mangiyuswat iti career guidance kadagiti pagadalanda.
Inbatadna a ditoy a maiyadal kadagiti Grade 10 students ken Senior High School students dagiti rumbeng a maammoanda para iti masakbayan dagitoy.
Mamati nga adu pay dagiti estudiante ti saan a makapanunot a nasayaat no ania ti kurso nga alaenda nangruna kadagiti in demand a kurso iti kolehio.
Inayonna a babaen ti Career Guidance Advocacy Program ket makatulong ken maiyam-ammo kadagiti estudiante ti usto a panangpili ti kurso para iti masakbayan dagitoy.
