LAOAG CITY – Mangnamnama ni Assistant District Engineer Lito Dian iti Department of Public Works and Highways 1st District Engineering Office a dumanon agingga iti ungto ti bypass road ti maestablisar a bike lane.
Inbatadna a napintas ti obserbasion ti publiko iti nalpasen a bike lane.
Inlawlawagna a no makita ti higher office-da ti positibo a komento ket posible a manayunan daytoy a proyekto.
Kabayatanna, inpakaammona nga iti agdama a bike lane ket naikonsiderar amin dagiti singasing ti Sangguniang Panlungsod ditoy siudad ti Laoag ken napintas ti nagbalin a resultana.
Maipalagip a ti bike lane ditoy siudad ket nagbalin nga isyu gapu iti saan a pananganamong ti konseho ti diseniona rason a naminpinsan a nabaliwan daytoy.
