LAOAG CITY – Inpakaammo ni Sanguniang Panlungsod Member Jayson Perera a nagturong ti kapitan iti Barangay Raraburan ditoy ciudad ti Laoag iti Session hall tapno umapela iti saan a panangaprobar ti konseho ti kiddaw dagitoy a pannakaipawil dagiti dadakkel a truck a dumalyasat iti barangay road.
Inlawlawag ni Atty. Perara a saan a naimbitaran ti kapitan iti nadakamat a barangay no di ket boluntaryo a nagturong iti session hall tapno makisarita a no mabalin nga aprubaran ti konseho ti inpasa ti Barangay Raraburan nga ordinansa.
Basar kenkuana, nakailanad iti Section 9 Republic Act 4136 nga awan iti mabalin nga ordinansa nga aggapu iti probinsia, ciudad ken barangay a mangipawil wenno manglimitar ti dagsen ti maysa a lugan a dumalysat kadagiti kalsada.
Innayon na na nga awan karbengan ti konseho ken barangay a mangipawil gapu ta ti kalsada ket pagdalanan amin a klase ti behikulo, ngem kuna na a no dagiti rangtay ket isu iti malimitaran dagiti rumbeng ken saan a dumalyasat.
Maipalagip nga ado dagiti barangay ditoy ciudad ti nangipasa ti ordinansa pakaseknan daytoy a banag gapu ta patienda a daytoy ti maysa a pakadadaelan dagiti barangay roads.
