LAOAG CITY – Inbatad ni Fire Senior Inspector Dondee Nyer Malaqui, ti firemarshall iti Bureau of Fire Protection iti ili ti Sarrat nga umabot iti agarop 2 nga ektarya ti naapektaran iti napasamak a grassfire iti paset ti Barangay 9 ken Barangay 10 iti nasao nga ili.
Inadmitir ni Malaqui a narigatan da a nangsebseb ti uram gapu ta napigsa ti angin isut gapuna nga alisto a nagkayamkam ti apoy.
Inpakaammo na pay a saan a nakadanun ti fire truck da iti mismo a nakapasamakan ti uram isut gapuna a ti inusar da a nagbunag ti danom a pinangsebseb da ket dagiti tricycle ken motorsiklo ti Bureau of Fire Protection, ken adda pay dagiti On-The-Job Trainee da a timmulong kadakuada.
Innayon na a nagpaot iti 5 nga oras ken 30 a minutos ti panagbantay da iti lugar kagiddan ti panangibakwit da kadagiti nakawarwar a taraken a possible a maapektaran ti grassfire.
Mainaig iti daytoy, kuna ni Malaqui a possible nga adda ti nagpuur iti lugar gapu ta naipagagangay a pupuuran dagiti tattao dagiti lidda tapno napinpintas ti panagtubo da nga isu iti kanen dagiti maiwarwar a dingwen.
