LAOAG CITY – Nakita a maysan a nalamiis a bangkay ti maysa a construction worker iti Barangay 11 Sta. Balbina ditoy siudad ti Laoag.
Ti biktima ket agtawen ti 19, awanan asawa, construction worker ken residente ti Barangay Himocdungan, Mabinay, Negros Oriental.
Basar iti Laoag City Police Station, napan riniing dagiti katrabahoanna a construction worker ti biktima tapno agsaganan para iti trabahoda.
Nupay kasta, saan a simmungsungbat ti biktima ken idi nakita ti situasionna ket insigida a timmawagda kadagiti otoridad.
Naammoan a sakbay iti napasamak, nakita ti biktima nga agin-inum kaduana dagiti pagayamna iti maysa a tiangge iti sangoanan mismo ti pasdek a pagtrabtrabahoanna.
Mainaig iti daytoy, nangiwayat ni Dr. Prescious Eden Garcia-Lim, City Health Officer ti Post Mortem Examination iti bangkay ket ditoy a naduktalan a ti rason ti pannakatay ti biktima ket gapu iti Acute Coronary Syndrome.
Kabayatanna, awan ti foul play a nakita iti pannakatay ti nasao a biktima.
