LAOAG CITY – Maysa nga agtawen ti 23 a lalaki idiay India ti nagbalin a pammaneknek nga awan ti imposible iti tao a napnoan ti arapaap.
Gapu ta iti baet ti kondisionna a dwarfism ket nabirngasan kas “World’s Smallest Doctor.”
Ni Ganesh Baraiya ket naipasngay idiay Talaja Thaluka, Gujarat, India.
Iti tawenna nga uppat, nariparen dagiti nagannak kenkuana a naginad ti panagdakkel daytoy.
Idi inpakitada isuna iti espesialista, naammoan nga adda ti dwarfism ni Ganesh.
Saan a nagbalin a lapped ken ni Ganesh ti kasasaadna ken nagbalin nga inspirasionna pay daytoy tapno agbalin a doktor.
Nagpursige ti panagadal ni Ganesh tapno ngumato dagiti grades-na. Idi nagturpos daytoy iti high school, nagaplikar daytoy iti Bachelor of Medicine and Bachelor of Surgery degree (MBBS).
Iti baet a pimmasa daytoy iti entrance exam, saan daytoy a pinalubusan ti Medical Council of India gapu iti height-na a 3 a kadapan.
Basar kadagitoy, saanna a maaramid ti responsibilidadna nangruna no adda ti emergency gapu iti height-na.
Saan a simmuko ni Ganesh ken immapela daytoy iti Supreme Court ti India.
Tawen 2018, pimmabor ti korte ken ni Ganesh ken pinalubusandan a mangala ti Bachelor of Medicine and Bachelor of Surgery degree.
Iti agdama, maysan a naan-anay a doktor ni Ganesh ken agtrabtrabaho kas intern iti Sir Takhtasinhji General Hospital.
