LAOAG CITY – Maragsakan ni Mrs. Carolyn Juan Agcaoili, Research Assistant 1 ti Provincial Education Office ti pannakapasa ni Dr. Manuel Christine Justine Castro Acoba iti kaliplippas a Physician Licensure Examination.
Ni Acoba ket dati nga iskolar ti Doctor of Medicine Scholarship Program babaen ti Provincial Government.
Gapu iti daytoy, insigida nga inpadanunna ti nabara a kablaawna iti nadakamat a baro a doktor ken mangnamnama a pilienna ti agserbi ditoy Ilocos Norte gapu ta agtultuloy ti panagkurkurang dagiti doktor nga agserbi kadagiti ospital ditoy probinsia.
Maipalagip a ti panagkurkurang dagiti agserbi a doktor kadagiti ospital ditoy probinsia saan laeng a kadagiti iwanwanwan ti gobierno probinsial ngem uray pay kadagiti pribado nga ospital ti kangrunaan a makagapu a mangididiaya ti gobierno probinsial ti doktor of medicine scholarship program.
Kabayatanna, malaksid ken ni Dr. Acoba, inpadanon ti gobierno probinsial ti kablaawna iti Mariano Marcos State Univeristy kalpasan a naaddaan ti sangagasut a porsiento a passing rate kadagiti nageksamen iti Physician Licensure Examination 2025.
Naammoan a pimmasa amin dagiti 12 a nageksamen manipud iti nadakamat nga unibersidad.
Maibilang ditoy ti dati nga iskolar ti Provincial Government of Ilocos Norte a ni Dr. Acoba, Dr. Jolina M. Andres, Dr. James Bacaoco, Dr. Angeline Caluducan, Dr. Jaya Cumigad, Dr. Chelsea Iranelle Dimayuga, Dr. Danielle Manalo, Dr. Gener Neilson Morales, Dr. Diones John Pallones, Dr. Frances Danielle Pascua, Dr. April Grace Retiza ken ni Dr. Lawrence Roi Reyes.
