LAOAG CITY – Naragsakan ni House Speaker Ferdinand Martin Romualdez ti pammaneknek iti umig-iget a suporta iti takder ti Pilipinas iti West Philippine Sea iti baet ti agresibo a tignay ti China.
Mensahe daytoy ni Romualdez kagiddan ti panangdayaw iti pammigbig ti Google Maps a ti Pilipinas ti addaan ti hurisdiksion iti West Philippine Sea.
Inpetteng ni Romualdez a daytoy a pammigbig ket saan laeng a teknikal wenno kartograpiko a panangipakita ti husto no di ket maysa a naisangsangayan a balligi ti pagilian iti benneg ti geopolitics.
Innayonna a ti addang ti Google Maps ket maysa a dakkel a suporta iti nabayagen a panangikagumaan ti Pilipinas maiyallubog iti Arbitral ruling idi 2016 a mangbigbigbig iti legal a karebbengan iti West Philippine Sea iti babaen ti international law.
