LAOAG CITY – Saanen pinaporma ti top NBA team nga Oklahoma City Thunder ti Memphis Grizzlies iti umuna a laban ti dua para iti 7-game series iti babaen ti 1st round elimination ti 2025 Playoffs.
Inpakita ti Thunder ti panagbalinna a top team ken insigida a nangdominar iti umuna a kuarter kalpasan a tinambakan ti 12 points ti kalaban iti iskor a 32 – 20.
Iti panaglippas ti 2nd quarter ket iggemen ti Oklahoma City Thunder ti 32 points a lamang.
Komportable a simrek ti Thunder iti maikatlo a kuarter ken ad-adda pay a ninayunan ti deficit ti 17 points agingga a naan-anay a nalpas ti matchup iti iskor a 131 – 80, pabor iti Oklahoma.
Saanen a nakakamat pay ti Memphis ti 50.5 overall shooting percentage ti Thunder pakairamanan ti napintas a depensa.
Naaramid ti Oklahoma City Thunder a makastrek ti 17 3-pointers iti pakabuklan idinto nga innem a tres laeng ti naiserrek ti Memphis manipud iti pakabuklan a 34 3-pointers a pinaruk-atan. Daytoy ket katukad laeng ti 17.6 a 3-point percentage.
Malaksid iti tres, nangdominar met ti Oklahoma City Thunder ti paint area ken nangiserrek ti 60 points idinto nga 48 laeng ti naaramid ti Memphis iti pakabuklan ti laban.
Gapu iti panagballigi, iggem ti top seed ti 1 – 0 a lamang kontra iti No. 8 seed idinto a maminsan manen a maisayangkay ti maikadua a laban iti Oklahoma, ti homecourt ti Thunder.
