LAOAG CITY – Dumanon ti sumurok 250 a ribu a tattao ti nangipaay ti respeto iti maudi a gundaway para iti pimmusay a lider ti Simbaan Katolika a ni Pope Francis iti uneg ti tallo nga aldaw a public viewing iti St. Peter’s Basilica iti Vatican City idiay Rome, Italy.
Manipud kadagiti deboto a Katoliko a naggapu pay kadagiti nagduduma a pagilian agingga kadagiti church ken political leaders ti nagturong iti tallo nga aldaw a public viewing a nagngudo idi kalman, aldaw ti Biernes, Abril 25 idi pormalen nga inserra ti kabaong ti Santo Papa iti naisayangkat a liturgical rites sakbay ti state funeral iti St. Peter’s Square ken ti pannakaitabon iti bangkay ti Santo Papa iti Basilica iti ruar ti Vatican ita nga aldaw ti Sabado, Abril 26.
Iti napalabas a tallo nga aldaw, naanus a nagpila ken naguray ti sumagmamano nga oras ti rinibu a nakipagladingit iti pannakatay ti Santo Papa tapno agpakada iti maudi a gundaway ken nangipaay ti respeto kenkuana.
Gapu ta ad-adu ngem iti ninamnama a bilang dagiti tattao a nagturong iti Vatican, naiyalud-od ti oras ti pananglukat ti Basilica agingga a nagpatnag.
Kabayatanna, agarup 200 a ribu a tattao iti St. Peter’s Square ken agingga iti 300 a ribu pay iti ruta a pagdalyasatan iti bangkay ti Santo Papa manipud iti Vatican a mapan iti pakaitabonanna iti St. Mary Major Basilica.
Mainaig iti daytoy, nangiwaras ti Italya ti sumurok 2,500 a police officers ken 1,500 a suldado tapno mangipaay ti seguridad para iti funeral ita nga aldaw a manamnama nga aglippas iti oras nga alas-2:00 ti malem, oras idiay Roma wenno alas-8:00 ti rabii, oras ditoy Pilipinas.
