LAOAG CITY – Inpasingked ni Dr. Gener Nelison Morales a taga siudad ti Batac ken maysa kadagiti nakapasa iti kaliplippas a 2025 Physician Licensure Examination nga awan pay ti planona nga agtrabaho iti ballasiw taaw uray adda ti mangidiaya kenkuana.
Inlawlawagna a kalikagumna nga ipangpangruna a mataming dagiti padana nga Ilokano wenno Pilipino sakbay nga agtrabaho iti sabali a pagilian.
Inbatadna nga idi ubing pay laeng ket kalikagumna nga agbalin nga Engineer wenno Architect ngem kabayatan ti panagtulid ti panawen ket nagbaliw ti kayatna a pagbalinan a kas maysa a Doctor.
Kunana a saan a nagbalin a nalaka ti panagadalna iti Medisina nangruna idi adda isuna iti maikapat a tawen gapu ta pimmusay ti amana.
Gapu iti daytoy, inpalgakna nga adda dagiti gundaway a kayatnan ti sumuko gapu kadagiti nadadagsen a pannubok a simmangbay iti biagna.
Nupay kasta, inpakaammona a babaen ti naiget a suporta ti pamiliana ket intultuloyna ti panagadalna agingga a nakapasa daytoy iti board examination.
Innayonna a nagturpos isuna iti kurso a Bachelor of Science in Biology idi tawen 2018 ken nangala daytoy iti kurso a Medisina.
