LAOAG CITY – Intuloy ni Canadian Prime Minister Mark Carney ti panagkampaniana kalpasan nga apagbiit daytoy a nagsardeng kalpasan ti napasamak a panangdarusdos ti lugan iti maysa a Pinoy street festival idiay Vancouver, Canada a nakatayan ti saan a bumaba iti 11 nga indibidual.
Naammoan nga idi kalman, aldaw ti Domingo ti maudi nga aldaw ti kampania sakbay ti eleksion idiay Canada a maisayangkat ita nga aldaw ti Lunes.
Iti baet ti insidente a napasamak nga asideg iti East 41st Avenue ken Fraser Street idiay Vancouver, nangipaay ti maudi a mensahe ni Carney ken Conservative leader Pierre Poilievre kadagiti botante.
Nagkari ni Poilievre a kissayan ti gastosen iti foreign aid ken ikkaten ti federal sales tax kadagiti kotse nga aramid ti Canada laketdi nga agtalinaed ti taripa ti Estados Unidos.
Bimmisita ni Carney kadagiti sumupsuporta kenkuana idiay Saskatchewan idi Domingo kalpasan nga inrakurakna iti napalabas nga aldaw idiay Ontario nga isuna ti kaepektiboan a kandidato tapno tarabayen ti Canada iti maysa a krisis gubuay ti taripa ni Trump.
