LAOAG CITY – Adda umdas a suplay ti anti-rabies vaccine ditoy siudad ti Laoag.
Daytoy ti inpakaammo ni Dr. Rodrigo Catcatan, mangidadaulo ti City Health Office ditoy siudad ti Laoag.
Inbatadna a nakasangpeten dagiti nagatangda nga anti-rabies vaccine ngem kunana nga alisto daytoy a maibus gapu ta adu latta dagiti agturturong ti opisinada tapno agpabakuna iti daytoy.
Inlawlawagna a libre amin dagitoy a maipaay kadagiti umili ditoy siudad ti Laoag.
Kabayatanna, maragsakan ni Dr. Catcatan gapu ta makitana ti kinaresponsibilidad dagiti umili gapu ta insigida a mapan dagitoy nga agpabakuna no makagat ken makaramutan dagitoy iti tarakenda nga aso ken pusa.
Maipalagip nga immunan nga inpakaammo ti City Health Office nga awan pay ti kaso ti human rabies ita a tawen ken maysa laeng ti aso a nagpositibo iti rabies ditoy siudad.
Inayonna a daytoy ti mangipakita nga agbalbalinen nga pet-friendly ken rabies free ditoy siudad ti Laoag.
