LAOAG CITY – Maysa a naidumduma a talento ti nangitag-ay ken ni Williams Martin Sanchez Lopez, maysa nga ama manipud iti Montevideo, Uruguay iti Guinness World Records gapu ta kabaelanna nga iruar dagiti matana iti agarup 19 millimeters.
Ni Williams nga agdama nga agnanaed idiay Milan, Italy, ket pormal a nabigbig para iti titulo a “farthest eyeball pop (male)” kalpasan a narukud ti doktorna ti naisangsangayan nga orbital protrusion a dumanon iti 19 mm (0.74 inches).
Inbatad ni Williams, naduktalanna ti talentona idi agtawen daytoy ti walo kabayatan a makiang-anagaw kadagiti pagayamna iti pagadalan.
Iti panagtulid ti panawen, inasana ti kabaelanna agingga a nasursurona nga iruar ti eye socket-na.
Malaksid iti panagbalinna a record holder, agtrabtrabaho met ni Williams iti benneg ti logistics ken aktibo iti social media no sadinno a naragsak nga inburayna ti naidumduma a talentona.
