LAOAG CITY – Ibilang ni Ms. Cathy Estavillo, Sekretario ti Bantay Bigas a pangpabanglo laeng ti gobierno ita nga eleksion ti pannakailako ti 20 a pisos iti kada kilo ti bagas iti Visayas.
Segun kenkuana, masapol a nationwide ti pannakaipatungpal ti nasao a programa ti Department of Agriculture gapu ta saan a mailibak nga umad-adu dagiti Pilipino ti makapaspasar ti panagbisin.
Inbatadna a daytoy a programa iti Marcos Administration ket kapada met laeng kadagiti immun-unan a nairubuat a programa ti gobierno a saan a marikna ti kaaduan a Pilipino gapu ta mapilpili laeng dagiti mabenepisiaran.
Mainaig iti daytoy, saan a mamati ni Estavillo a ti 20 a pisos iti kada kilo ti bagas nga ipatungpal ti gobierno ket dumanon agingga inton tawen 2028 gapu ta limitado laeng ti volume rason nga ibilangna a band aid solution laeng daytoy.
Inlawlawagna a saan a maliklikan nga adda ti maris pulitikana ti pannakaipatungpal ti nasao a programa gapu ta dandanin ti eleksion.
Innayonna a naiget a bantayanda ti klase ti bagas a mailako iti balor a 20 a pisos iti kada kilo tapno maipasigurado met laeng a napintas ti kalidad ti gatangen dagiti Pilipino.
Immuna iti daytoy, inrakurak ti Department of Agriculture a mangrugi ti pannakaipatungpal ti 20 a pisos iti kada kilo ti bagas inton Mayo 1 iti paset ti Visayas.
