LAOAG CITY – Napagnunumoan dagiti kameng ti Sangguniang Panlungsod ditoy siudad ti Laoag a maiyakar ti pannakaisayangkat ti maikadua a session ti konseho iti bulan ti Mayo inton Mayo 14 imbes a Mayo 13.
Segun iti maysa a kameng ti konseho, ti tunggal eleksion ket us-usaren ti Commission on Elections ti Sangguniang Panlungsod Session Hall ken City Auditorium tapno iproklamar dagiti mangabak.
Inbatad ti Presiding Officer nga umanamong isuna iti pannakausar dagitoy a paset ti lokal a gobierno no isu ti naipagagangay a maus-usar tunggal eleksion.
Gapu iti daytoy, napagtutulagan dagiti kameng ti Sangguniang Panlungsod ditoy siudad ti Laoag nga imbes nga umakarda ti lugar a pakaisayangkatan ti session ket i-reschedule-da laengen daytoy.
Maipalagip nga immun-unan nga inrakurak ti Presiding Officer a no aniaman ti agbalin a resulta ti eleksion ket rumbeng nga itultuloy dagiti kameng ti konseho nga aramiden ti trabahoda gapu ta manamnama nga aglippas pay laeng iti termino dagiti agdama nga opisial inton Hunio 30, 2025.
