LAOAG CITY – Mamati ni Presidente Ferdinand Marcos Jr., nga ad-adda pay a mapasayaat ti kalidad ti bagas, maipangato ti biruk dagiti mannalon ken agbalin nga al-alisto ti produksion.
Daytoy ket kalpasan a pormal a nairubuat ti Rice Processing System II Facility nga addaan ti maysa a multi-stage rice mill ken uppat a recirculating dryers.
Inbatad ni Marcos a manamnama a maipangato pay ti milling recovery rates manipud iti agdama a 55 a porsiento ket mapagbalin a 58 a porsiento nga agturong iti 63 agingga iti 65 a porsiento.
Kunana nga iti tulong ti nasao a teknolohia, bumaba met ti post-harvest losses ti agarup 32 a ribu a metriko tonelada iti kada tawen katukad ti sumurok 541 a milyon pisos a biruk para kadagiti mannalon.
Inlawlawagna a daytoy a proyekto ket paset ti napalawa a gagem ti gobierno tapno magun-od ti food security.
Inpannakkel ti Presidente nga iti babaen ti administrasionna, nakaipatakder daytoy ti 150 a Rice Processing System manipud kadagiti nagduduma a paset ti pagilian.
Inpasingked ti Presidente a tunggal lugar iti pagilian nga am-ammo kas rice producing areas ket maaddaan ti rice processing plant tapno saanen a marigatan pay nga ikabil dagiti mannalon dagiti irikda.
