LAOAG CITY – Mamati ni Mrs. Remedios Bañaga a taga ili ti Burgos a saan a ti panagtrabaho iti ballasiw taaw tapno lumung-aw ti panagbiag.
Segun kenkuana, basar iti kapadasanna kas maysa nga Overseas Filipino Worker idiay Hong Kong iti uneg ti maysa a tawen ket inpagarupna a ti tulbek ti panagnam-ay ti biag ket ti panagtrabaho iti ballasiw taaw.
Nupay kasta, napaay daytoy isu a nagawid ditoy pagilian ken nagpanunot ti pamastrekan a mabalin a mangsupusop iti inaldaw-aldaw a kasapulan iti pamiliana babaen ti panaglakona ti gamet empanada.
Inbatadna a tawen 2011 idi nangipatakderda ti bukudda a puesto para iti panaglakoda ti gamet empanada agingga a nagbalinen a nalatak ken daydaywen dagiti turista nangruna kadagiti balik-bayan.
Inlawlawagna a ti ilaklakoda nga empanada ket pudno a naidumduma gapu iti nayon a laokna a gamet a mangpaimas ti raman ti empanada.
Kunana a naimbitaran pay isuna a nakipaset iti maysa a cookfest no sadinno a naitandudo ti ipanpannakkelna a klase ti luto ti gamet empanada.
Innayonna nga iti agdama ket mailaklako ti gamet empanada iti presio a 120 agingga iti 150 a pisos.
Naammoan a tunggal weekend ket sumursurot dagiti annakna tapno tumulong a mapan aglako ti negosioda.
Kabayatanna, naammoan a nakaturpos ti kolehio ti dua kadagiti uppat nga annakna babaen ti panaglakoda ti gamet empanada.
