LAOAG CITY – Bimmales iti panangraut ti Pakistan iti air bases ti India kagiddan ti maipagarup a pannakaiwayat ti missiles manipud kadagiti tallo nga air bases.
Basar iti Pakistan Army, natamaanda ti adu a targets idiay India kangrunaanna iti India administered a Kashmir.
Naammoan a dagiti sumagmamano nga Indian military targets a maipagarup a natamaanda ket ti Brigade Headquarters KG Top, Field supply depot Uri, Artillery Gun Position Derangyari, BrahMos battery site Nagrota, Udhampur airfield, Pathankot airfield ken Suratgarh airfield.
Kaaduan kadagiti nasao a lokasion ket asideg wenno adda iti de facto border a manggudua iti pagin-innagawan a Kashmir region iti nagbaetan ti New Delhi ken Islamabad.
Karaman kadagiti airfield nga adda iti uneg ti undisputed borders ti India ket ti Pathankot iti Punjab state ken Suratgarh iti Rajasthan state.
Segun iti Pakistan military, nangirubuatda ti “eye for an eye” retaliation target ti Indian air bases a maipagarup a nausar iti pannakairubuat ti missiles kontra iti Pakistan.
Iti agdama, awan pay ti komento iti biang ti Ministry of Defense ti India ken Indian Air Force iti claim ti Pakistan.
