LAOAG CITY – Inrakurak ni Commission on Elections Chairman George Erwin Garcia a kasapulan pay laeng a maamendaran ti Republic Act No. 9369 wenno ti Automated Election Law wenno mangipasa ti baro a linteg tapno maisayangkat ti manual recount.
Daytoy a palawag ket inaramid ni Garcia kagiddan ti panawagan a maminsan manen a bilangen babaen ti manu-mano dagiti butos iti kaliplippas a May 12 Midterm Elections.
Kunana a gagem ti nasao a linteg ket tapno maaddaan ti ‘full’ automated polls a saanen a kasapulan ti manual counting dagiti butos.
Nupay kasta, nailanad iti linteg ti panangisayangkat ti random manual audit (RMA) a ti intension ket maberipikar no umiso ti ar-aramiden a panagbilang dagiti makina kadagiti balota.
Kunana nga awan pay ti budget ti Commission on Elections para iti manual recount dagiti balota.
Immunan nga inpakaammo ni Garcia a maysa nga election protest ti mabalin a mang-trigger para iti manual recount dagiti butos.
Maipalagip nga inproklamar metten ti Commission on Elections ti 12 a nangabak a Senador para iti eleksion idi Sabado.
Naikeddeng nga inproklamar ti poll body dagiti nangabak a party-list groups ita nga aldaw ti Lunes, Mayo 19.
