LAOAG CITY – Nabirukan ti bangkay ti maysa a construction worker iti bakante a lote iti Barangay 46 Nalbo ditoy siudad ti Laoag.
Ti biktima ket agtawen ti 50, naasawaan ken construction worker iti Laoag International Airport ken residente ti Barangay Pagsanahan Sur iti ili ti Badoc.
Basar iti Laoag City Police Station, apaman a nagturong iti kataltalonan ti maysa a residente iti Barangay 46 Nalbo ditoy siudad ti Laoag ket nakitana ti biktima a nakadasay nga awan ti puotna.
Gapu iti daytoy, insigida nga inpakaammo ti nasao a residente kadagiti dadduma pay a construction workers iti maysa a construction firm maipanggep daytoy a banag.
Naammoan nga adda ti bagkong iti ngato a paset ti buksit ti biktima.
Iti agdama, agtultuloy ti maiwaywayat a naun-uneg nga imbestigasion.
