LAOAG CITY – Inpakaammo ni Engr. Alford Airon Co Velasco a residente ti Barangay 1 Sta. Rita iti ili ti Bacarra ken Rank 9 iti kaliplippas a 2025 Chemical Engineer Licensure Examination nga atiddog a pasensia ken panangipasnek ti panagadal ti nagbalin a tulbek iti panagballigina.
Segun kenkuana, saanna a ninamnama nga agbalin daytoy a maysa kadagiti topnotchers iti nasao a board examination gapu ta narigatan pay isuna iti naiyuswat nga eksaminasion.
Inbatadna a nag-enroll daytoy iti maysa a nalatak a review center babaen ti online rason nga adda laeng isuna iti uneg ti pagtaengan a nakatutok iti panagrebyuna.
Inlawlawagna a para kenkuana ket ad-adda a nakapokus daytoy iti online gapu ta awan ti makaistorbo kabayatan ti panagrebyuna.
Kunana a daytoy ti umuna a daras a nangala isuna ti nasao nga eksaminasion nga insigida met a nakapasa.
Naammoan a dagiti nagannak ni Engr. Velasco ket maysa a manursuro ken housewife ken addaan laeng ti maysa a kabsat.
Mainaig iti daytoy, malaksid ken ni Engr. Velasco a nakagun-od ti rating nga 86.30% ket nagun-od met ni Engr. Gerald Addap Ibarra ti Rank 10 nga addaan ti rating nga 86.20%.
Kabayatanna, adda ti 13 a nagturpos ti Mariano Marcos State University ti nakapasa iti nasao nga eksaminasion a karaman kadagiti 602 a baro a licensed chemical engineers ditoy pagilian.
