LAOAG CITY – Kinondenar ti pito a pagilian ken ti self-ruled island a Taiwan ti panangbomba ti water cannon iti barko ti Chinese Coast Guard iti barko ti Pilipinas nga asideg iti Pag-asa Cay 2 wenno Sandy Cay.
Malaksid iti Taiwan, karaman kadagiti pagilian nga insigida a nangipeksa ti panangkondenarna iti baro a pananghar-harass ti China ket ti Japan, Amerika, United Kingdom, Australia, Canada, Netherlands, New Zealand ken European Union.
Iti naisangsangayan a public statement manipud idiay Taiwan a tagtagikuaen met ti China kas paset ti teritorioda, inrakurak ti Foreign Ministry daytoy a naiget a pagam-amkanda iti napeggad a tignay ti China Coast Guard kontra iti civilian vessels ti Pilipinas.
Inkalintegan ti Taiwan iti panagsuporta daytoy iti Pilipinas ken inallukoyna dagiti amin a partido a solbaren ti nagbaetan dagiti maseknan a pagilian iti nakappia a wagas.
Agpada a binabalaw da United States Ambassador to the PH MaryKay Carlson ken Australian Ambassador KH Yu ti reckless actions ti Chinese vessel ken ibagbagana nga insagmakna iti rigso dagiti biag ken stability iti rehion.
Inladawan ni United Kingdom Ambassador Laure Beaufils ti insidente kas “worrying excalation of behviour” idinto nga inbatad ti Ambassador ti Japan a madandanagan met daytoy iti napeggad a tignay ti China pakairamanan ti panagusar daytoy ti water cannons.
Nangipeksa met ti Estados Unidos, Netherlands, Canada ken New Zealand ti pannakaalarma iti pananghar-harass iti civilian vessels ti Pilipinas.
