LAOAG CITY – Inpaima ni Senate President pro-tempore Jinggoy Estrada kadagiti legal experts ti desision no mabalin a ma-override wenno masurot ti maysa a resolusion a mangipabasura iti impeachment case ni Vice President Sara Duterte maidasig iti panagakem ti Senado kas impeachment court.
Inbatad ni Estrada a saan daytoy nga abugado isu a daytoy a banag ket ipapaadalna kadagiti abugadona.
Mamati ti Senador a constitutional duty-da a denggen ti impeachment case kontra iti asinoman nga impeachable officer ken daytoy ket nakasurat iti Konstitusion.
Immunan nga inadmitir ni Estrada a nakaala isuna ti kopya ti resolusion idi Lunes ken inpabasada daytoy kenkuana.
Nagkedked met ni Senador Joel Villanueva nga agkomento iti nasao a banag.
Kuna ni Villanueva, aniaman nga adda ti pakainaiganna iti merito ti kaso ket saannan a kayat pay ti agsarita gapu ta maysa isuna kadagiti agbalin nga hues iti impeachment trial.
