LAOAG CITY – Inbilin ti Land Transportation Office (LTO) iti agarop 200 a driving schools iti intero a pagilian nga agpalawag mainaig iti maipagarop a pannaka-tamper dagiti computer systems da tapno makaakomodar ti ad-ado nga estudyante ngem ti maipalubos iti kada aldaw.
Basar iti Land Transportation Office, napatuludanen ti show cause orders dagiti driving schools gapu iti sumagmamano a panaglabsing da kas ti panag-upload ti ad-ado a theoretical and practical driving course certificates ngem ti maipalubos a maipaay.
Malaksid iti daytoy, naduktalan pay ti ahensya nga adda dagiti driving schools a mangipapaay ti sertipikasyon uray dagiti saan pay a nakakompleto iti oras a rumbeng nga ileppas da.
Uray dagiti 88 a district heads nga akinsakop kadagiti 200 a driving schools ket minandar ti Land Transportation Office nga agpalawag mainaig kadagiti nasao nga aktibidad ken no apay nga agpapan ita ket saan da pay a nasolbar.
Maipalagip a sinuspenso ti ahensya ti agarop 100 a driving schools gapu iti saan da a panangipakita wenno non-compliance iti umiso a theoretical driver’s training.
