LAOAG CITY – Inpakaammo ni Sangguniang Panlungsod Member John Michael Fariñas, Chairman ti Committee on Education nga in-safe keep ti Department of Education – Schools Division of Laoag City ti 147 a ribu a pisos nga insentibo para kadagiti estudiante ditoy siudad ti Laoag a nakisalip iti Regional School Press Conference.
Segun kenkuana, ti nagbalin a palawag ti DepEd Laoag no apay a kinasapulan nga i-hold-da pay laeng iti nasao a kantidad ket tapno masigurado nga awan ti agbalin a maris pulitikana daytoy agingga a saan a nalpas ti eleksion.
Inbatadna a maawatanna ti nagbalin a desision ti DepEd nga i-hold ti kuarta nga inted ni Mayor-elect James Bryan Alcid para kadagiti nakisalip ti RSPC.
Mainaig iti daytoy, mangnamnama ni Konsehal Fariñas a maibunong ti insentibo sakbay iti panagseserrek ti klase dagiti ubbing tapno usaren dagitoy a pang-allowance.
Maipalagip a nakigtot ni Mayor-elect Alcid iti panangsaludsod kenkuana ti maysa nga estudiante kabayatan ti panagkampaniana iti napalabas nga eleksion.
Daytoy ket kalpasan a maipagarup a saan pay a naited ti insentibo para kadakuada nga estudiante a napan nakisalip iti Regional Schools Press Conference iti napalabas a bulan.
