LAOAG CITY – Dandani a nangitunda ti desgrasia ti kellaat a panag-U Turn ti SUV iti Gilbert Bridge ditoy siudad ti Laoag.
Segun ken ni Mr. Leonard de Guzman, driver ti modern jeep iti ruta Laoag-Batac-Paoay a kabayatan a dumaldalyasat iti Gilbert Bridge ket kellaat a nag-U Turn ti maysa nga SUV iti bangir a linya ti kalsada iti rangtay nga agturong iti sentro ditoy siudad manipud iti linya nga agturong iti ili ti San Nicolas ken airport road.
Inbatadna a ti pagsayaatanna ket adayo pay idi bumangir ti SUV a rason no apay a nakasardeng ken napakadaanna daytoy.
Nupay kasta, inlawlawagna a no bilang napaspas iti panagpatarayna kadayta a gundaway ket dakkel ti posibilidadna a nadungparna daytoy.
Kunana nga apaman a nakitana ti SUV a mapan iti bangir a linya ket nagsardeng ken inur-urayna pay laeng daytoy a makaballasiw iti bangir a kalsada.
Inpakaammoanna a saanna a maikabesa ti plate number ti SUV ken adda ti Close Circuit Television wenno CCTV camera a posible a nakairekord iti pasamak ngem saanna a masinunuo no kasano nga i-operate daytoy tapno mai-review ti napasamak.
Kabayatanna, kinondenar ni Mr. Rolando Bonao, maysa a tricycle driver ditoy siudad ti Laoag iti nasao a napamasak.
Inpettengna a saan a nainkalintegan ti inaramid ti driver ti SUV gapu ta mabalin a tuladen dagiti dadduma a motorista.
Inlawlawagna a rumbeng laeng a matiliw daytoy kas ar-aramiden dagiti traffic aide kadagiti iligal nga ag-U Turn.
Innayonna nga iti naunday a panawen nga agpaspasada isuna ket daytoy pay laeng ti umuna a gundaway nga adda ti kellaat a nag-U Turn iti katengngaan ti Gilbert Bridge.
