LAOAG CITY – Agproblema ti San Nicolas Damilian Association Inc. gapu ta saan da a mapasang-at ti danum manipod iti karayan a mapan iti irigasyon.
Segun kenni Mr. Antonio Mahor, ti presidente iti nasao nga asosasyon, nga adda ti nasurok nga 400 nga ektarya ti agur-uray a mamulaan ita a cropping season ngem gapu ta nasawang ti tambakda ket saanda a marugyan ti agtalon.
Daytoy ti rason no apay a nagkiddaw da iti National Irrigation Administration a lukatanda ti dike tapnu adda ti as-asideg a pagnaan ti danum a mapan iti irigasyon.
Kuna ni Mahor a dua a lawasen nga ub-ubraenda daytoy ken namnamaen da nga iti umay a lawas ket malpasen.
