LAOAG CITY – Inpakaammo ni Engr. Rommel Batuac, Chief Operation ti National Irrigation Administration nga adda ti 29 a porsiento pay laeng ti namulaan iti planted area ditoy probinsia.
Segun kenkuana, kadagupan iti 20 a ribu nga ektaria ket 5,800 nga ektaria pay laeng ti namulaan iti planted area dagiti mannalon.
Inbatadna a kadagitoy koma a gundawayen ket umaboten iti 60 a porsiento ti namulaan ngem gapu iti kinakurang ti danum kadagiti kataltalonan ket marigatan nga agmula dagiti mannalon.
Inlawlawagna a daytoy ket maysa kadagiti epekto ti Super El Niño iti baet nga adda dagiti sumagmamano a mapaspasaran a panagtudo ditoy probinsia.
Mainaig iti daytoy, kuna ni Engr. Batuac a mangnamnama a dakkel ti agbalin a benepisio ti panagtudo gubuay iti Tropical Storm Kiyapo kadagiti pagtalonan dagiti mannalon tapno makamula dagitoy a nasayaat.
Innayonna nga adda ti maibunong a 16 nga units ti water pump inton Lunes, Hulio 27 para kadagiti maseknan a mannalon.
