LAOAG CITY – Sumango iti administrative sanction dagiti government official a mapaneknekan a mang-discriminate kadagiti ‘persons living with human immunodeficiency virus (PLHIV)’ wenno dagiti tattao a makapaspasar ti Human Immunodeficiency Virus.
Inruar ti Civil Service Commission (CSC) ti baro resolusion a naglaon kadagiti administrative disciplinary action a mabalin a sangoen dagiti empleado wenno opisial ti gobierno a maduktalan nga agaramid ti nasao a diskriminasion.
Karaman kadagiti discriminatory practices a dinakamat ti Civil Service Commission ket ti pannakaipawil kadagiti indibidual a mapagat-atapan nga addaan ti Human Immunodeficiency Virus tapno agbiahe, agpili ti kalikagum a pagnaedan, panangipawil kenkuana tapno agtrabaho iti public office ken panangbul-bully kenkuana gapu iti sangsangoenna a medical condition.
Karaman pay ditoy ti panangipawil kadagiti Human Immunodeficiency Virus patients a maka-avail ti umdas ken maiyannatop a credit ken insurance services ken burial service.
Basar iti Civil Service Commission, dagiti baro a pagannurotan ket epektibo para kadagiti amin nga opisial ken empleado ti gobierno manipud iti national government agencies, regional ken provincial office dagitoy ken local government units.
Sakupen ditoy dagiti empleado ken opisial ti state colleges and universities ken dagiti government-owned and controlled corporations nga addaan ti original charter.
Nailanad pay iti nasao a resolusion nga amin a reklamo mainaig iti kapada a diskriminasion ket solbaren iti naikeddeng a 2017 Rules on Administrative Cases in the Civil Service a mangibagbaga kadagiti pagalagadan para iti amin a disciplinary ken non-disciplinary administrative cases a maipadpadanon iti Civil Service.
