LAOAG CITY – Nauram ti San Antonio Elementary School iti Barangay San Antonio iti ili ti Sarrat.
Segun ken ni Ms. Donalyn Asuncion, Head Teacher ti nasao a pagadalan, agarup alas tres ti parbangon idi nakaawat daytoy ti tawag a maur-uram ti pagadalanda.
Inbatadna nga adda ti uppat a classrooms ken maysa a conference room ti nauram iti saan pay a masinunuo a rason.
Inlawlawagna nga apaman a nakasangpet iti pagadalan ket nakitana a napuskol ti asok ken dakkelen ti apoy nga alisto a nagramram.
Kunana a nauram dagiti libro ken nagduduma nga instructional materials dagiti mangisursuro pakairamanan dagiti dadduma pay nga appliances kas kadagiti computer.
Mainaig iti daytoy, inpakaammo ni Asuncion nga awan ti klase dagiti Grade 4 agingga iti Grade 6 pupils gapu ta nauram dagiti classroom dagitoy.
Innayonna a kitaenda dagiti dadduma a room a saan a maus-usar iti pagadalanda para iti temporario a classroom dagiti agad-adal.
Naammoan a nagpaut ti sumurok maysa nga oras ti napasamak nga uram sakbay a naan-anay a nasebseban dagiti bumbero.
Kabayatanna, ti San Antonio Elementary School ket back to back National Winner iti Brigada Eskwela kadagiti naglabas a tawen.
Iti agdama, agtultuloy ti naun-uneg nga imbestigasion ti Bureau of Fire Protection iti ili ti Sarrat maipanggep iti namunganayan ti nasao nga uram.
