LAOAG CITY – Nagbalin nga inspirasion dagiti baro a pulis iti siudad ti Batac ni retired Police Major Artemio Clemente.
Inbatadna a dakkel a pammadayaw para kenkuana nga agbalin nga inpirasion ken napintas a pagwadan dagiti naubing ken kabarbaro a kameng ti Philippine National Police.
Inlawlawagna a saan a nalaka ti responsibilidad ti maysa a pulis gapu ta kasapulan a mapagtalinaed ti panangipatungpal ti linteg iti patas ken siguradoen a natalged dagiti umili iti aniaman a risgo.
Kunana a kas pannakabagi ti linteg ket rumbeng laeng a liklikan nga agaramid kadagiti maikanniwas iti linteg tapno saan a babalawen dagiti gagangay laeng a tattao.
Mainaig iti daytoy, inpakaammo ni retired Police Major Clemente nga awan ti nalaka wenno alisto a trabaho ngem no ania ti pagragsakan ti puso ket arig saan a marikna ti bannog ken rigat ti maysa a trabaho.
Naammoan a nagserbi kas maysa a pulis ni Clemente iti uneg ti 33 a tawen.
Iti agdama, makumikom ni retired Police Major Clemente a makipaspaset kadagiti nagduduma nga aktibidad ken programa iti lokal a gobierno iti siudad ti Batac no sadinno a mangipapaay daytoy ti libre a pukis kadagiti residente.
