LAOAG CITY – Inrakurak ti Department of Education a mangrugi ita nga School Year 2025-2026 dagiti klase manipud iti Kindergarten agingga iti Grade 3 ket kangruaan a maisuro kadakuada ti Filipino ken English subjects.
Mabalin pay nga usaren dagiti mangisursuro ti Filipino Sign Language kadagiti klase para kadagiti ubbing a saan a makangngeg wenno nakapsot ti panagdengngegda.
Ti Department of Education Order No. 020, s. 2025 nga addaan ti petsa nga Hulio 3, 2025 ket maipatpatungpal kadagiti probision ti Republic Act No. 12027 wenno An Act Discontinuing the Use of Mother Tongue as Medium of Instruction (MOI) manipud iti Kindergarten agingga iti Grade 3.
Iti Section 2 ti Republic Act No. 12027, naipasardeng ti panagusar ti mother tongue kas medium of instruction nga addaan ti monolingual ket mabalin a maitultuloy iti panagusar ti learner’s language pakairamanan dagiti pagadalan a mangipatpatungpa ti Indigenous Peoples Education Program.
Ti regional languages ket agserbi nga “auxillary” wenno katinnulongan nga usaren iti panangisuro no sadinno a mabalin nga umakar dagiti mangisursuro iti panagusar iti daytoy tapno matulungan dagiti agad-adal a maawatan ken maasa a naimbag.
Mainaig iti daytoy, dagiti mother tongue ket nasken a maaddaan ti opisial nga ortograpia a binukel ken naipablaak ti Komisyon iti Wikang Filipino ken dokumentado a bokabulario. Ti panangisuro ti mother tongue ket depende kadagiti mangisursuro nga addaan ti panagsanay tapno aramiden daytoy.
Basar iti Department of Education, bayat a nakatulong ti Mother Tongue-Based Multilingual Education (MTB-MLE) iti panangsolbar kadagiti makaabbeng iti pagsasao a mapaspasaran dagiti agad-adal a saan a Filipino wenno Ingles ti umuna a pagsasaoda, ti programa ket addaan met ti limitasion.
Kabayatanna, ti Department of Education Order No. 20 ket sakupenna dagiti amin a pagadalan iti elementaria ditoy Pilipinas.
