LAOAG CITY – Nagpakita iti publiko ti Iran Supreme Leader a ni Ayatollah Ali Khamenei iti umuna a gundaway sipod nangrugi ti panangraut ti Israel.
Basar iti television footage, makita ditoy ti Iran Supreme Leader a nangkablaaw kadagiti deboto iti mosque kabayatan ti seremonia a maysa nga aldaw sakbay ti Shia festival ti Ashura.
Ti naudi a panagparang ti Iran Supreme Leader ket idi Hunio 13 babaen ti recorded address daytoy kabayatan ti rinnupakda ti Israel a nakatayan dagiti Iranian commanders ken nuclear scientists.
Maipalagip a nangiwayat ti panangatake ti Israel kadagiti nuclear ken military sites ti Iran no sadinno a bimmales met ti aerial attacks ti Iran kontra iti Israel.
Naammoan a kabayatan ti 12-day war ti Israel ken Iran, nagpakita ni Khamenei iti three video messages a rumrummuar nga aglemlemmeng daytoy iti bunker.
Immuna iti daytoy, nakiraman ti Estados Unidos iti gubat no sadinno dinadaelda dagiti Iranian nuclear facilities idi Hunio 22 pakairamanan ti Fordo, Natanz ken Isfahan babaen kadagiti 125 nga United States military aircraft.
Kabayatanna, agarup 900 nga indibidual ti natay kabayatan ti 12 nga aldaw a gubat.
