LAOAG CITY – Inwaragawag ti bilyonaryo a negosyante a ni Elon Musk ti panangbuwangay na ti baro a political party, daytoy ket ti America Party.
Inaramid daytoy ni Musk sumagmamana a lawas kalpasan ti kontrobersyal a panagririda ken ni US President Donald Trump.
Inbatad ni Musk a ti binukel na nga America Party ket dakkel a karit para iti Republican ken Democratic two-party system.
Nupay kasta, saan pay a nalawag no ti baro a partido ket pormalen a nairehistro iti election authorities idiay Estados Unidos.
Ni Musk ket naipasngay iti ruwar ti Amerika ken saan a mabalin nga agpaidasig a para presidente isut gapuna burburtia para kadagiti Amerikano no siasinno ti mangidaulo iti binukel na a partido.
Mainaig iti daytoy, inpetteng ni Treasury Secretary Scott Bessent a nasaysayaat no tutukan laengen ni Musk dagiti negosyo na ken saanen a makibiang iti pulitika.
Innayon na nga uray dagiti boards of directors kadagiti kompanya ni Musk ket kaykayat da a saan a makiraman pay iti pulitika ti bilyonaryo a negosyante.
Kabayatanna, awan pay ti direkta a komento ti White House ti pangta ni Musk ngem inrakurak na nga adda dagiti gakat a naipasa a mangipaneknek a ti Republican Party ket nagtalinaed a natibker.
