LAOAG CITY – Plano ti legal counsel ni dati a Presidente Rodrigo Duterte nga usaren ti resulta ti Senate committee hearing nga indaulwan ni Sen. Imee Marcos.
Daytoy ket tapno ipetteng a ti pannakaarestar ti dati a presidente agingga iti pannakaikabil na idiay The Netherlands ket saan a nainkalintegan.
Segun ken ni Nicholas Kauffman, ti finding ti nasao a committee ket mangipakpakita a ti pannakaarestar ti dati a presidente ket adda maris politika na.
Kuna na nga ipakpakita daytoy a ti nagbalin nga operasyon ket maysa nga ‘whole-of-government’ effort tapno mapabagsak dagiti Duterte.
Inpaganetget pay ti abogado a ti pannakaarestar ken pannakaikabil ti dati a presidente iti The Hague ket maysa a klase ti kidnapping, banag a rimuar met daytoy iti Senate investigation nga indaulwan ti presidential sister.
Immunan nga inkalintegan ni International Criminal Court (ICC) Deputy Prosecutor Mame Mandiaye Niang a no ipetpetteng ti kampo ti dati a presidente a daytoy ket nakidnap idi naikabil iti International Criminal Court ket napatpateg no agtalinaed iti kustodyar ti nasao a tribunal.
Inpetteng pay ti prosecutor a saan a pilyen ti biktima ti kidnapping a maisubli manen iti kustodyar dagiti nangkidnap kenkuana no maikkan ti gundaway a makalibas.
Nupay kasta, inpalgak met ni Kaufman a ti claim na mainaig iti kidnapping ket nakabasar laeng iti committee report nga inparuk-at ni Sen. Marcos, kalpasan ti sumagmamano a serye ti imbestigasyon.
Inyarig pay ti abogado ti conclusion ti nasao a report no sadinno a pakaskasoan ti senadora iti Office of the Ombudsman ti sumagmamano a nangangato nga opisyal ti gobiern a maipagarop nga adda ti pakainaigan na iti pannakaarestar ti dati a presidente.
