LAOAG CITY – Binilin ni Sen. Raffy Tulfo ti Department of Migrant Workers a tutukan ti situasion dagiti Filipino seafarers nga inatake ti Houthi rebels iti Greek-owned bulk carrier Eternity C a nakalugan dagiti sumagmamano a Filipino seafarers kabayatan ti panaglayagda iti Red Sea nga asideg iti kabaybayan ti Yemen idi Hulio 7.
Basar iti report ti European Union Operation Aspides ken iti private security firm nga Ambrey, agturong nga agpa-amianan iti Suez Canal ti nasao a barko idi kellaat a pinaltu-paltogan isuda dagiti rebelde a grupo manipud iti babassit a bangka dagitoy.
Nagusar pay dagiti rebelde kadagiti drones a kargado dagiti bomba.
Insigida a nakikoordinar ni Sen. Tulfo iti Department of Migrant Workers tapno ammoen ti kasasaad dagiti kailian a marino a nakalugan iti nasao a barko.
Mainaig iti daytoy, inrakurak ni Sec. Hans Leo Cacdac, naka-deploy daytoy iti maysa a misyon iti babaen ti United Nations World Food Programme nga adda ti kargana a grain cargoes ken agturong koma idiay Jeddah, Saudi Arabia para iti refueling sakbay ti insidente.
Inbatad ni Cacdac a 21 kadagiti 22 a crew ti Eternity C ket Pilipino pakairamanan ti Kapitan ngem iti agdama ket awan pay ti pormal a kumpirmasion no mano dagiti natay, nasugatan ken mapukpukaw.
Naammoan a kas pre-cautionary measure, sinuspenso ti Department of Migrant Workers ti panangi-deploy ti LMA kadagiti Filipino seafarers kadagiti barko dagitoy.
Inbatad ni Sen. Tulfo iti Department of Migrant Workers nga ituloyda laeng ti iwaywayatda a panangberipikar ken panangimbestigar tapno insigida a maipadanon ti gobierno ti tulong para kadagiti seafarer nga agkasapulan ken mangiwayat ti rescue operations tapno saan met a madanagan dagiti pamilia dagiti maseknan a marino nga adda ditoy pagilian.
Inkari ni Sen. Tulfo nga agtultuloy a tutukanna ti panagdur-as daytoy nga insidente.
