LAOAG CITY – Inpakaammo ni Mr. Danver Dela Cruz, Focal Person ti Regional Agricultural Fishery Council iti National Food Authority – Regional Office I nga ad-adda a pinili dagiti sumagmamano a mannalon ditoy probinsia ti agmula ti mais ngem iti pagay gapu iti nababa a presio ti irik ken nangina a presio dagiti mausar iti panagtalon.
Segun kenkuana, gapu iti daytoy agdama a mapaspasaranda iti kinarigat ti panagtalon ket imbes a sangapulo nga ektaria ti minulaanna ti pagay ket nagbalin laengen a maysa nga ektaria.
Inbatadna nga ad-adu pay ti inmulana a mais gapu ta nalaklaka ti magastosna iti panagmula iti daytoy ken saan a nabuslon ti panagpadanum.
Inlawlawagna nga adda dagiti tulong nga ipapaay ti gobierno ngem inadmitirna a kurang daytoy para kadakuada a mannalon.
Kunana a saan koma a limitaren ti National Food Authority ti panaggatangda kadagiti irik dagiti mannalon.
Kabayatanna, inkiddawna iti Department of Agriculture nga ipangato ti ilatangda a pundo para iti pannakaipaay ti tulong kadakuada a mannalon.
