LAOAG CITY – Nagpanawagan manen ni Ukrainian President Volodymyr Zelensky kadagiti kaalyadona a pagilian a tulungan isuda a papigsaen ti air-defense dagitoy.
Iti panagatendarna iti Rome Conference, naaddaan ti tsansa ti Ukrainian President a makasango dagiti sumagmamano a lider.
Naamoan nga adda ti naiyuswat a video call iti agarup 30 a pagilian nga inawaganna a “Coalition of the Willing.”
Inpetteng ni Zelensky a napateg ti maipaay a tulong dagiti pagilian nangruna ket saan nga agsarsardeng ti Russia kadagiti air strike daytoy iti sumurok tallo a tawen a gubat.
Nagkiddaw pay daytoy iti European Union a nasken nga ipatungpal nga insigida ti pannusa kontra iti Russia.
Nagkari met ti United Kingdom nga agsuplayda ti sumurok lima a ribu nga air defense missiles iti Ukraine ken sumurok $384 milyon a tulong nga agas ken taraon.
Daytoyen ti maikapat a taripnong no sadinno a nagbalin nga host ni Italian Prime Minister Giorgia Meloni.
