LAOAG CITY – Mamati ti abogado dagiti biktima ti maipagarop nga extrajudicial killings (EJKs) a lanidem a bigbigen ti International Criminal Court (ICC) ti Senate resolution para iti house arrest ni dati a Presidente Rodrigo Duterte.
Daytoy ti nagbalin a rakurak ni Atty. Kristina Conti kalpasan ti inpila a resolusyon ni Senador Alan Peter Cayetano iti kangatoan a pagpandayan linteg iti kongreso a gagem na a maipadan iti house arrest ti dati a Presidente bayat nga iyur-uray ti possible a pannakausig ti maipagarop a kaso a crimes against humanity intono Setyembre 23 ita a tawen.
Sumagmamano kadagiti nadakamat a rason iti naipila a resolusyon ket gapu iti kumapkapuy a salun-at ti dati a presidente gapu iti kinataeng na ken nabayag a social isolation a mabalin a mangpakaro iti pisikal ken emosyonal a ksalun-at na.
Nupay kasta, kuna ni Atty. Kristina Conti a rumrumuar nga awan ti pammaneknek iti medical status ti dati a Presidente iti naipila a resolusyon gapu ta maipagarop nga awan ti pruweba ni Cayetano a nabisita na ni Duterte ken paspasig laeng dagitoy a sayangguseng.
Innayon na a napinpintas no adda ti maipresentar nga ebidensya ngem rumrumuar a daytoy ket political posturing ti maysa nga ahensya ti gobyerno wenno tapno makaukkon ti political support iti babaen ti panagapela iti emosyonal a wagas.
Inlawlawag pay ni Atty. Conti nga uray aniaman nga aspeto ket saan a bigbigen ti international tribunal ti nasao a resolusyon nga arigna bibiangan dagiti ar-aramiden da a proseso.
Inpaganetget ni Atty. Conti, a ti kiddaw ti kampo ti dati a presidente para iti interim release na ket maysa a saritaan a kasapulan a matratar iti nagbaetan dagiti prosecutor kadwa da ti defense ken dagiti korte.
Maipalagip nga immunan nga inrakurak a mismo ni Vice President Sara Duterte, karaman ni senador Bong Go a tulang ken kudil laengen ni dati a Presidente Duterte bayat a nakabalud iti detention facility ti International Criminal Court iti The Hague, Netherlands.
