LAOAG CITY – Kiniddaw ni Senador Alan Peter Cayetano nga ipanawagan ti Senado a maipadalan iti house arrest ni dati a Presidente Rodrigo Duterte.
Nakaipalaon daytoy iti resolusion nga inpila ni Cayetano a nangipeksa ti takder ti Senado a gutigoten ti Pilipinas a kiddawen iti International Criminal Court ti interim release ni dati a Presidente Duterte pakairamanan ti kiddaw a maipadalan daytoy iti house arrest idiay The Hague kabayatan ti pannakadengngeg ti kaso.
Inpetteng nga uray simmanod ti Pilipinas iti Rome Statute ket mabalin latta a makitulag iti International Criminal Court iti babaen ti embahada idiay The Hague para kadagiti kondision ti temporario a panangarestar.
Nailanad iti resolusion a mabalin a makikoordinar iti International Criminal Court ken iti Embahada ti pagilian idiay The Hague a kiddawen a dumalan iti klase ti house arrest, modified house arrest wenno aniaman nga arrangement a paboran ti korte.
Nadakamat pay iti resolusion ti kumarkaro a kasasaad iti salun-at ti dati a Presidente, ti kinataengna ken nabayag nga agmaymaysa a posible nga ad-adda a kumaro iti pisikal ken emosyonal a situasion.
Immapela ti nasao a resolusion iti gobierno ti Pilipinas nga ipaay ti kapada a courtesy a naipaay ken ni dati a Senador Leila de Lima nga ituloy ti responsibilidadna kabayatan a nakabalud.
