LAOAG CITY – Nagballaag ti High Patrol Group ditoy Ilocos Norte iti publiko seknan iti carnapping.
Segun ken ni P/Maj. Jhonwel Balueta, Chief ti Highway Patrol Group ditoy probinsia, adda dagiti indibidual a managgundaway nga agpammarang a buluden laeng dagiti lugan ngem ti kinapudnona ket itaray ken ilakoda dagitoy.
Inbatadna a saan nga insigida nga agtalek nangruna no saan nga am-ammo ti tao tapno maliklikan a mabiktima ti carnapping.
Inlawlawagna kadagiti adda ti planona ti gumatang ti segundamano a lugan ket nasken nga iberipikar nga umuna iti High Patrol Group wenno ti Land Transportation Office sakbay a gatangen ken bayadan ti lugan.
Innayonna nga iti agdama ket awan ti nairekord ti opisinada nga aniaman a carnapping incident sipod idi Enero 1, 2025.
